入行八年撻著六個 林峰：最怕女方愛上我 [12/3/2006]

常言：「戲子無情」，出身大富之家的林峰偏偏公子多情。入行八年，先後與六位女藝員傳緋聞，其中五個都因為與他合作拍劇而傳撻著，劇接劇地戀火相傳。林峰直認他感情豐富，每次跟女藝員拍戲總會投入地愛，然後抽身，但他卻一直憂心被女對手錯愛。　林峰出身自大富之家，從事內地房地產生意的林父林華國坐擁六億身家，被喻為「廈門李嘉誠」。身為林家大少的林峰住舊山頂道豪宅、Benz跑車，連無線中人都稱呼他做「少爺」，既靚仔兼有名有利，少爺威威追女仔固然順理成章。

「冇好感演唔到戲」　

陳法拉、陳敏之、胡杏兒、楊怡、葉璇和李彩華六個緋聞女友之中，除陳法拉外，其餘五個都因為與林峰拍劇而傳撻著，他們在鏡頭前談情說愛，回到現實，也許仍然混淆不清，但真愛、錯愛抑或博愛，只有當事人自知。　有關拍戲撻著的問題，林峰說：「冇好感係演唔到戲，我地唔係機械人，會令自己投入，唔係一號表情、二號表情，自己要代入， 果一刻鍾意果個人就真係鍾意，之後唔係果回事，呢樣係演員必備條件，好感一定要有，唔係點演戲？但想追咩？未到。　「其實係睇自己可唔可以冷靜，返到屋企仲鑽牛角尖，係咁諗會影響工作，俾工作誤導左自己，我都好慶幸自己冇（拍戲弄假成真），講笑咁講啦，有時太投入，都會驚對方瀨野（愛上自己），男仔一定係做主導添啦。」

揀女奄尖不能太醒　

每次拍劇都傳界女，林峰揚言以前會激到生蝦咁跳，但現在的反應就得啖笑：「傳緋聞同你見係兩樣野，難免有ｄ觀眾會信，亦阻唔到人地點諗，但我身邊的人、朋友都冇過問，屋企人好相信我，唔好影響大家做朋友最緊要。」　林峰繼續解構他的愛情觀：「私底下我其實唔係咁隨便的人，如果唔係我身邊就唔會有咁多朋友，識我的人都知我揀擇。好矛盾架，我揀女仔唔可以太聰明，又唔可以唔醒，我唔鍾意解釋，下下做乜都要講，頂唔順。　「同一班朋友飲下野、食下飯，係好正常社交活動，每次都有男有女，有好感的異性可以再進一步，但一係自己驚，一係人地驚過你。我只係想好普通咁食下飯，入行之後都未做過。」戲子有情必須尊重　入行八年來，林峰與不少資深演員合作過，但至今令他緊記教誨的就有羅嘉良和古天樂，他說：「撈家（羅嘉良）教我演戲、心態上點處理，佢好錫我，又話畀我聽做人道理，由生活到工作上都肯教。佢同我講過，話做演員好值得尊重，人地成日話戲子無情，我地至係最有感情的動物，演戲時係欺騙緊自己的感情去娛樂觀眾，所以我好尊重職業。　「另一個係古仔（古天樂），佢會教我一ｄ緋聞的處理方法，佢話唔係事實的唔回應，我唔鍾意解釋，你信就信，唔信就點解釋都係冇用。

吳卓羲既敵且友 2006年03月12日【蘋果日報】

吳卓羲（左）與林峰當年合作拍攝古裝劇《大唐雙龍傳》而成老友，彼此友誼牢不可破。劇照
無線近年力捧林峰、黃宗澤、吳卓羲和馬國明四位新紮小生，林峰是四人中入行最早的一個。○○年被委以重任，在重頭劇《尋秦記》中飾演嬴政一角，可惜後勁不繼，近年已被吳卓羲與黃宗澤趕過頭，然而林峰說：「我起步早，佢地幅度大，有多ｄ人成個行業至可以蓬勃，應該開心至係，比較唔一定係壞事，咁先keep到動力，令自己不停進步。」愛古裝懶理甩頭髮　林峰跑得慢，除了被緋聞拖累外，拍古裝劇太多亦有影響。事實上，大多數小生提起拍古裝都怕怕，一來古裝劇難紅人，二來要穿厚服，三來超長對白又難記，還要黐頭套會引致脫髮，但是，林峰演了一套又一套的古裝，仍然甘之如飴。　吳卓羲曾經強調自己是個時裝人，古裝劇應留給林峰，林峰聽罷只笑道：「叫佢算罷啦！一個演員應該古今都做得好，咁至可以全面發揮，戲路會闊好多。」　林峰與吳卓羲私底下很老友，工作上卻為競爭對手，問林峰如何維繫這一段戰爭中的友誼？他便說：「定期同Ron（吳卓羲）傾心事，同佢都算見得好密、傾到心事的圈中朋友。當年我地曾經講過，唔好諗住大家唔會係競爭對手，（競爭）一定會有，我知人地會呢ｄ野黎講，大家亦會聽到呢ｄ說話，但私底下絕對冇事，我地處事、諗野方式幾接近，大家心照，唔會聽其他人講幾句野就有影響，我地會互相迫大家進步，咁係好事。」　今時今日吳卓羲，大鼻傳聞滿天飛，林峰卻為老友撐到底，他說：「佢係好直的人，唔覺佢有乜野問題，同我當初識佢時冇變過。」

有米少爺闖公仔箱　　
年齡： 26歲
學歷： 美國加州大學一年級，主修建築，副修音樂
入行經過： 九八年無線藝員訓練班旁聽生，之後簽約成為演員
背景：　父親林華國坐擁六億身家，契媽為利孝和夫人
參與電視劇： 《覆雨翻雲》、《Yummy Yummy》、《天涯俠醫》、《大唐雙龍傳》、《血薦軒轅》、《律政新人王》、《雲海玉弓緣》、《流金歲月》、《再生緣》及《尋秦記》等
曾奪獎項： 04年憑《大唐雙龍傳》獲無線台慶我最喜愛的電視角色獎　　　　　　
03年於無線台慶奪飛躍進步男藝員獎等